БИШКЕК, 21-июль — Sputnik. Саламаттык сактоо министрлигинин Улуттук фтизиатрия борборунун жетекчилери тендер өткөрүүдө жана борбордун жерин колдонууда мыйзам бузушканын УКМКнын коррупцияга каршы күрөшүү кызматы аныктады.
Маалыматка ылайык, 2004-2005-жылдары аталган борбордун жетекчилери "К-А" жана "А.Б.Т." ишканаларынын өкүлдөрү менен жең ичинен сүйлөшүп алып, имаратты оңдоодо жана тендер өткөрүүдө мыйзамда көрсөтүлгөн эрежелерди бузушкан. Анын кесепетинен бюджетке 3 миллион 245 миң сом чыгым келтирилген.
Андан сырткары, Аламүдүн районундагы Таш-Дөбө айылындагы фтизиатрия борборунун жер тилкеси мыйзамсыз алынып, жеке турак-жай курууга берилген.
УКМКнын коррупцияга каршы күрөшүү кызматынын материалдарынын негизинде Башкы прокуратура кылмыш жаза кодексинин 304-беренеси ("Кызмат абалынан кыянаттык менен пайдалануу") жана 171-беренеси ("Ишенип берилген мүлктү коротуу же ээлеп алуу") боюнча кылмыш ишин козгоду.
