БИШКЕК, 13-июль — Sputnik. Ала-Тоо аянтынын жанындагы Курманжан датка аллеясында уюштурула турган ифтарга биринчи кезекте жарандардын коопсуздугунан улам уруксат берилбегенин Sputnik агенттигине Бишкек мэриясынын социалдык бөлүмүнүн жетекчисинин милдетин аткаруучу Нурбек Курманбеков билдирди.
Жарандык активисттер 15-июлда Ала-Тоо аянтынын жанындагы Курманжан датка аллеясынында орозо кармагандарга бешбармак менен ооз ачыруу уюштурууну пландашкан. Бирок массалык иш-чарага мэрия уруксат берген эмес.
Курманбековдун айтымында, аянтта боло турган ифтарга жапырт уулануунун алдын алуу жана аптаптуу ысыктан улам тыюу салынды.
"Бишкектин аянты тамактанууга ылайыкташкан эмес. Нооруз учурунда күн анча ысык болбойт, анын үстүнө сүмөлөк аз көлөмдө таратылат. Бул жерде бешбармак тартылат экен. Биз Ормон Нурбек уулун чакырып, сүйлөштүк", — деди мэрия өкүлү.
Курманбеков ифтарды тамак-аш даярдоо үчүн бардык шарттар каралган жайда өткөрүү максатка ылайык болорун кошумчалады. Мындан тышкары, ал рамазан айында орозо кармаган адамдардын организми алсыз болгондуктан, ачык асман алдындагы аянттан оору жуктуруп алуу коркунучу курч экенин белгиледи.
