БИШКЕК, 10-июль — Sputnik. Бишкек шаарынын борбордук бөлүгүндө орозо кармагандарга 15-июлда ооз ачыруу пландалып жатканын иш чаранын уюштуруучусу Ормон Нурбек уулу Sputnik сайтына билдирди.
Ала-Тоо аянтынын жанындагы Курманжан Датка аллеясында кечки саат 17-00дөн 22-00гө чейин жүздөн ашык кишиге ооз ачырылат.
"Мэрияга барып сүйлөштүк, демилгени жылуу кабыл алышты. Буюрса, дүйшөмбү күнү уруксат чыгат. Ошондой эле муфтият менен да сүйлөшүп жатабыз. Ооз ачыруу карапайым калкка уюштурулат", — деди Нурбек уулу.
Уюштуруучулар ооз ачууга орто эсеп менен 150 кишидей келет деп пландашууда жана аларга беш бармак берилет.
Ормон Нурбек уулу бул самаалыкты жеке өзүнүн атынан уюштуруп жатканын айтып, аны колдогон башка жаштар жана достору бар экенин кошумчалады.
