БИШКЕК, 11-июль — Sputnik. Президент Алмазбек Атамбаев Кыргызстан Борбордук Азия өлкөлөрүнүн ортосунда эки тараптуу негизде чек ара райондорунда ишенимди бекемдөө жөнүндө макулдашууну иштеп чыгып, кол коюу демилгесин көтөргөндүгүн эске салганын өлкө башчынын маалымат кызматы билдирет.
Атамбаев 2014-жылы Дүйшөмбү шаарында өткөрүлгөн ШКУнун Саммитинин жүрүшүндө Кыргызстан Борбордук Азия өлкөлөрүнүн ортосунда эки тараптуу негизде чек ара райондорунда ишенимди бекемдөө жөнүндө макулдашууну иштеп чыгып, кол коюу демилгесин көтөргөндүгүн эске салды. Президент мындай макулдашуу Казакстан менен Кыргыз Республикасынын ортосунда кол коюлуп, эки мамлекетте тең ратификациялангандыгын белгиледи. Алмазбек Атамбаев Кыргызстандын башка кошуналары тарабынан дагы бул демилге колдоого алынат деген ишенимин билдирди.
Мындан тышкары, өлкө башчы өз сөзүндө коопсуздукту камсыз кылуу приоритеттүү маселелердин катарында калышы керектигин белгиледи. Ал өткөн отурумдан бери региондо жана жалпы эле дүйнөдө кырдаал өзгөрдү, туруксуздуктун жаңы очоктору пайда болуп, радикалдуу-экстремисттик уюмдар кыйла жандана баштаганын айтты.
"ШКУнун алкагында коопсуздукту бекемдөө багытындагы иштерди активдештирүү зарыл. Кыргызстан Афганистанда тынчтык, туруктуулук болушуна кызыктар жана Афганистан өкмөтүнүн өлкөдө туруктуулукту камсыз кылууга, демократиялык кайра түзүүлөрдү жүргүзүүгө жана өлкөнү өнүктүрүүнүн улуттук пландарын ишке ашырууга багытталган аракеттерин кубаттайт", — деди президент.
Мамлекет башчысы баңги заттарды мыйзамсыз жүгүртүүнүн өсүшү региондогу туруктуулукту жана коопсуздукту сактоого коркунучтардын бири экендигин баса белгиледи.
"Биз кабыл алып жаткан баңгикоркунуч көйгөйү боюнча Билдирүү жана экстремизмге каршы күрөшүү боюнча ШКУнун Конвенциясынын долбоорун иштеп чыгуу тууралуу чечим ШКУнун алкагында биргелешкен күрөштү улантууга жана аны күчөтүүгө чечкиндүү даярдыгыбызды далилдеп турат", — деди Атамбаев.
ШКУга мүчө мамлекеттердин лидерлери 2015-жылдын 3-сентябрында Кытайда Дүйнөлүк экинчи согуштун Жеңишинин 70 жылдыгына карата эскерүү иш-чарасына чогулушат.
