БИШКЕК, 8-июль — Sputnik. Тунис бийлиги Сус шаарындагы теракттан кийин Ливия менен чектешкен аймакты бойлото дубал тургуза баштады. Бул туурасында өлкө премьер-министри Хабиб Эссид билдирет.
Өкмөт башчысы тургузулган дубалдар "Ислам мамлекетинин" террорчуларынын өлкөгө кирип келишине бөгөт кылып, Ливия менен чектешкен райондогу абалды көзөмөлгө алып турууга жардамчы болот деп ишенимин айтты.
"Биз Ливия менен чектешкен аймактарды бойлото дубал куруп, аң казууга кириштик. Анын узундугу 168 чакырым, бул иштерди 2015-жылдын аягына чейин бүтүп калабыз", – деди Эссид.
Тунистеги ири террористтик чабуул 26-июнда Сус шаарына жакын аймактагы Эль-Кантауи курортуна жасалып, жергиликтүү студент бейкапар жүргөн эс алуучуларга ок чыгарган. Imperial отелинде 40 адам өлгөндүгү, алардын көбү Улуу Британиялык туристтер экендиги аныкталган. Андан сырткары, дагы кыркка жакын турист жарадар болгон. Куралдуу кол салуунун жоопкерчилигин "Ислам мамлекети" уюму өзүнө алды.
