БИШКЕК, 7-июль — Sputnik. Невьянскидеги (Россиянын Свердлов облусу) колониядан кыргызстандыктын өлгөнүнө байланыштуу Екатеринбургдагы башкы консулдуктун кызматкерлери, прокурор Сергей Охлопков жана Россиянын тергөө комитетинин облус боюнча Тергөө башкармалгынын жетекчиси Валерий Залорин жолугат. Бул тууралуу КР Тышкы иштер министрлигинин маалымат кызматы билдирди.
Буга чейин "Замандаш" ассоциациясы билдиргендей, Свердлов облусундагы №46 катуу тартиптеги колониядагы 500дөн ашык киши экинчи күн катары менен ачкачылык жарыялоодо. Алардын мындай аракетине абактагы кыргызстандык жарандын каза болушу себеп болгон. Анын өлүмүнө абактын кызматкерлеринин тийиштиги бар деп айтылууда.
КР ТИМден билдиришкендей, 5-июлда Екатеринбургдагы башкы консулдуктун кызматкерлери абалды жакындан билүү үчүн колонияга келишкен. Учурда РФтин Кылмыш жаза кодексинин"Адамды өлүмгө алып келгидей кылып денеге зыян келтирүү", "Кызматтык абалынан кыянаттык менен пайдалануу" беренелери боюнча кылмыш иши козголду.
