БИШКЕК, 7-июль — Sputnik. Жалал-Абад облусундагы Өзгөн районунун 26 жашар тургуну, алдын ала маалыматтарга ылайык, Свердлов облусундагы Невьянск шаарынын №46 катуу тартиптеги колония кызматкеринин ур-токмогунан каза болгонун Sputnik агенттигине "Замандаш" ассоциациясы билдирди.
Облустун тергөө комитети кабарлагандай, 2012-жылдан түрмөдө отурган жаран Невьянск шаарынын борбордук ооруканасында каза болгону тууралуу маалымат ишемби күнү түшкөн.
Аталган факт боюнча РФнын "ден соолугуна атайылап залал келтирүү жана анын натыйжасында өлүмгө дуушар кылуу" беренеси боюнча кылмыш иши козголду.
"Жарандын туугандары анын каза болгондугу тууралуу кабар алышты. Өлгөн адамдын аты-жөнү азырынча айтылбайт. Свердловскидеги кыргыз диаспорасы окуянын өнүгүшүнө көз салып турат", — деп айтылат билдирүүдө.
Тергөө комитети кырсык болгон жер текшерилип, мекеменин кызматкерлери да, оорукана дарыгерлери да суракка алынганын билдирди.
"Мындан тышкары, өлгөн жаран менен бирге жаза мөөнөтүн өтөгөндөр да суралууда. Каза болушунун так, туура себебин аныктоо үчүн сот-медициналык экспертиза дайындалды", — дейт мекеме.
"Замандаш" ассоциациясы тергөө иштери Свердлов облусунун прокурору менен тергөө башкармалыгынын көзөмөлүндө экенин тастыктады.
Ачкачылык жарыялагандар ашканага барбай, жакындары алып келип берген азык менен тамактанышууда.
