БИШКЕК, 7-июль — Sputnik. Ички иштер министри Мелис Турганбаев Жол кайгуул кызматкерлери тоскон адам өзүн министрдин тууганымын деп тааныштыргандарга ишенбөө керектигин билдирди.
Чогулушта министр аталган окуя Жол кайгуул кызматында кызматында өздүк курам менен тарбиялык иштер жүргүзүлбөгөнүн тастыктай турганын жана табелдик куралды пайдалануу системасы кайрадан карап чыгууга муктаж экенин белгиледи.
"ЖККнын борбордук аппараты кошумча сабактарды өтүп, инспекторлор арасында жарандар менен сүйлөшүү, табелдик куралды пайдалануу боюнча түшүндүрүү иштерин жүргүзүшү керек", — деди министр.
Турганбаев министрдин тууганымын дегендерге, жалган визиттик карточка көрсөткөндөргө ишенбей, инспекторлор кызматын так аткарууну уланышы керектигин айтты.
"Мен визиттик карточка колдонбойм. Эгер жол эрежесин бузган адам чын эле менин тууганым болуп чыкса, ал бардык жарандар сыяктуу эле мыйзам чегинде жооп бериши керек", — деди министр.
Жыйындын жүрүшүндө Турганбаев видео боюнча иш прокуратура органдары тарабынан иликтөөгө алынарын кошумчалап, бирок аталган окуяга тиешеси бар инспекторлорго карата министрлик да чара көрүшү керектигин белгиледи.
