БИШКЕК, 1-июль — Sputnik. Кыргызстандыктардын Россияда жүрүшүн мыйзамдаштыруу боюнча миграциялык макулдашуунун мөөнөтү өзгөрбөй турганын Эмгек, миграция жана жаштар министри Айбек Азыранкулов Sputnik агенттигинин түз алып көрсөтүүсүндө билдирди.
Министр менен болгон маектин жүрүшүндө соцтармак пайдалануучуларынын бири "бюрократиядан улам" Россиядагы кыргызстандыктар үчүн миграциялык макулдашуунун мөөнөтү жылдырылбайбы деген суроо узатты.
"Өткөн аптада министрлик жана КР элчилигинин өкүлдөрү ФМК жетекчилиги менен жолугуп, макулдашууну дагы бир ирет тактап чыгышты. 10-июлга чейин толук маалымат беребиз", — деди Азыранкулов.
Мындан тышкары, Санкт-Петербургда кыргызстандыктарга Россия аймагында 30 күнгө чейин каттоосуз жүрүүгө уруксат берген макулдашууга кол коюлган.
Кыргызстандын ЕАЭБге кошулуусун эске алуу менен ФМК тарабынан үч жылга чейин РФ аймагына кирүүгө тыюу салынган жарандарга аталган өлкөгө баруусуна жол ачылды. Шарт боюнча мында тыюу салынган убакыттын жарымы өтүшү керек.
