БИШКЕК, 1-июль — Sputnik. Кыргыз өкмөтүнө караштуу Финансы полициясынын ыкчам кызматкери пара алып жаткан жеринен кармалганын УКМК маалымат кызматы билдирет.
Маалыматка ылайык, Корруцияга каршы кызматы (ККК) тарабынан ыкчам-издөө иш-чараларын жүргүзүүдө Финополдун Ош, Баткен облустары жана Ош шаары боюнча ыкчам кызматкери майор кылмыш жоопкерчилигине тартуу опузасы менен жарандан 100 миң сом өлчөмүндө пара талап кылган факты аныкталды.
30-июнда аталган кызматкер 60 миң сом өлчөмдөгү пара алып жатканда кармалды.
УКМКнын материалдарынын негизинде Баткен облустук прокуратурасы Кылмыш жаза кодексинин 313 ("Опузалап пара талап кылуу") беренесине ылайык кылмыш ишин козгоп, тергөө иштери жүрүп жатат.
Ал эми Финансы полициясы өз кезегинде аталган кызматкер учурда мекемеге тиешеси жок экенин, Финполдо Ош, Баткен облустары жана Ош шаары боюнча ыкчам кызматкери болуп мурда иштеп кеткенин билдирди.
