БИШКЕК, 30-июнь — Sputnik. Вице-премьер-министр Абдырахман Маматалиев Экономикалык кылмыштуулукка каршы күрөшүү мамлекеттик кызматынын жетекчилиги жана кызматкерлери менен жолукканын өкмөттүн маалымат кызматы билдирет.
Маалыматка ылайык, жолугушуу өткөрүүгө Финпол кызматкерлеринин бир катар оор кылмыш жасоого шектелип, камакка алынышы себеп болгон.
"Акыркы он күндүн аралыгында мекеменин 6 кызматкери камакка алынды. Бул Финансы полициясына эле эмес, бүтүндөй мамлекеттик бийликтин кадырына шек келтирип жатат", — деди вице-премьер.
Маматалиев тартип жана аны көзөмөлдөө маселеси анык бир бөлүмдө эмес, жалпы кызматта жана бардык деңгээлде курч турганын белгиледи.
"Эмне үчүн кызматкерлер арасында тарбиялык иштер жүргүзүлбөйт, эмне себептен жогорудагы фактылардын алдын алуу жана түп-тамырынан бери жоготуу боюнча чаралар көрүлбөйт. Коопсуздук, кадр кызматтарынын, төраганын орун басарларынын иши таптакыр байкалбайт", — деди чиновник.
Ал Финпол жетекчисине бир жума ичинде камакка алынган кызматкерлердин тартип жоопкерчилигин карап чыгууну тапшырып, бардык маалымат премьер-министрге билдирилерин кошумчалады.
