КР чек ара кызматы өзбек чек арачыларын жалган маалымат таратпоого чакырат

БИШКЕК, 1-июль — Sputnik. Кыргызстандын мамлекетик чек ара кызматы өзбек чек арачыларын жалган маалымат таратпоого чакырат. Бул тууралуу аталган мекеменин маалымат кызматы билдирди.

Белгилей кетсек, 29-июнда Баткен облусунун Кадамжай районундагы Айдаркендеги отряддын "Кара-Шоро" чек ара тозотунун аймагында Кыргызстандын чек арачылары мамлекеттик чек арага жакын келген өзбек чек арачыларына эскертүү берген. Ага баш ийбеген өзбек тарап кыргыз чек арачыларына ок чыгарган. Өзбекстан жак эки тараптуу сүйлөшүүлөрдү бузуп, такталбаган чек ара аймагына өздөрүнүн кишилерин алып келип койгон.

Өзбекстандын мамлекетти коргоо комитети "Машаланг" чек ара көзөмөл жайы жакта болгон окуяны кыргыз чек арачылар баштаган деген билдирүү тараткан болчу.

Ушул эле күнү эки мамлекеттин чек арачылары жолугуп, бирдиктүү жыйынтыкка келишкен эмес. Өзбек тарап чек арачыларынан аракеттерин мыйзамсыз деп табуудан баш тарткан. Жолугушуунун жыйынтыгында тараптар окуяны өз алдынча иликтеп, анын жыйынтыктарын бири-бирине берүүгө милдеттенишкен.

1-июлда Кыргызстандын Мамлекеттик чек ара кызматы расмий түрдө өзбек тарапты такталбаган, чындыкка коошпогон маалыматтарды таратпоого чакырды.