БИШКЕК, 30-июнь — Sputnik. Депутаттары бүгүн эс алуунун алдында акыркы күнү пленардык жыйынга чогулат да, аягында ЖКнын V чакырылышынын кезектеги сессиясы расмий жабылат.
Депутаттар жайкы эс алууга чыгар алдында бир нече ирет кезексиз жыйын өткөрүп, мыйзам долбоорлорун карашты. Бүгүнкү күн тартибинде депутаттар бир нече маселелерди карап, эл аралык бир катар документтерди ратификациялашат. Алардын арасында Жарандык, Салык кодексине, Аскердик жана альтернативалык кызмат өтөө жөнүндө мыйзамдын долбоору бар.
Парламентарийлер бул күндөрү жыйындын күн тартибинде турган мыйзам долбоорлорун, республика үчүн маанилүү делген бир катар маселелердин чечилишин күзгө калтырышты.
Эл өкүлдөрү сентябрда келип өз ишин улантат да, ЖКнын V чакырылышынын курамы өзүнүн мөөнөтүн күздө аяктайт, себеби октябрдын аягы, ноябрдын башында Кыргызстанда парламенттик шайлоо болмокчу.
