БИШКЕК, 29- июнь — Sputnik. Жогорку Кеңеш өкмөткө "Кумтөр" маселесин чечүүгө 1-октябрга чейин мөөнөт берди.
Буга чейин өкмөттүн сунуштарын карап чыгып, парламент "Кумтөрдү" улутташтыруудан баш тартууу чечкен.
Парламентте Сариев "Кумтөрдүн" алдында эки гана жол тургандыгын, бири — Centerra Gold Inc. менен келишимге кол коюу, экинчиси кендин иштешин токтотуу экендигин айтты.
"Эгерде өндүрүштү токтотсок, канадалыктарга компенсация төлөп калабыз. Анда бизде пенсия менен жөлөк пулдарды берүүдө кыйынчылыктар жаралат. Ал эми экинчи вариантка токтосок, кен иштей берет да, долбоорду реструктуризациялоо маселеси уланат",- деди Сариев.
Жыйында премьер Сариев "Кумтөр" долбоору боюнча маселени чечүүгө күзгө чейин убакыт берүүнү парламенттен сурады.
Жыйынтыгында депутаттардын сунуштарын эске алуу менен Жогорку Кеңештин токтом долбоору кабыл алынды. Ага ылайык, КР Өкмөтүнө бир катар тапшырмалар берилди.
