БИШКЕК, 29-июнь — Sputnik. Конституциялык палатанын (КП) соту Клара Сооронкулованын кызматтан кетишин парламент колдогон жок.
Буга чейин Жогорку соттун Конституциялык палатасында укук коргоочулар Нурбек Токтакунов менен Токтайым Үмөталиеванын биометрикалык маалымат чогултуу жөнүндөгү мыйзамдын Конституцияга шайкеш келиши боюнча арызы сотто каралган. Жогорку Кеңештин өкүлү Света Болжурованын өтүнүчү менен Конституциялык палатанын коллегиясы буга чейин укук коргоочулардын арызын карап келген сот Сооронкулованы ишти кароого катыштыруудан четтетүү чечимин кабыл алган.
Парламент дүйшөмбү күнкү кезексиз жыйынында президенттин Сооронкулованы кызматтан мөөнөтсүз бошотуу сунушун колдогон жок. Талап кылынган 80 добуштун ордуна Сооронкулованы кызматынан бошотууга депутаттардын 77си гана макул болгон. Экинчи ирет добуш берүүдө 75 эл өкүлү макулдугун берген.
"Ата Мекен" фракциясы жыйынга соттун өзүн чакырууну талап кылды. Бирок КСДП фракциясынын мүчөсү Галина Скрипкина Сооронкулованын келиши кажетсиз, керектүү документтердин баары бар деп билдирди.
ЖК төрагасы Асылбек Жээнбеков кызматтан алынып жаткан адамды угуу керектиги эч жерде жазылбаганын айтып өттү.
Жыйынтыгында парламент аталган маселени кароону 30-июнга жылдырды.
