БИШКЕК, 29-июнь — Sputnik. Тунистин Ички иштер министри Наджим Эльгарсали жекшембиде кечинде 40 адамдын өмүрүн алып кеткен теракттан кийин туристтик полицияга курал бериле турганын билдирди. Бул туурасында ал Facebook тармагындагы баракчасына жазган.
Сус жана башка туристтик Хаммамет, Жерба шаарларында коопсуздукту сактоо иштери катаалданып, көзөмөл өткөрүү жайларына кошумча полиция кызматкерлери тартылды.
Бул кандуу окуядан кийин негизинен Батыш өлкөлөрүнөн келген туристтер Тунистен агылып чыгып кете баштады.
Туристтерди аткан тунистик Сейфуддин Ар-Резки 1992-жылы туулган. 2011-жылы орто мектепти бүтүп, техникалык адистик боюнча институтка кирген, үч жылдан кийин бакалавр дипломун алып, магистратурага өткөн. Маалыматтарга караганда, ал курсташтары менен өлкөдө расмий каттоодон өтпөгөн мечиттерге барып, Кайруан шаарында радикалдык исламчылар менен жолугуп жүргөн.
Тунисте 18-мартта да "Ислам мамлекети" катышкан теракт болгон. Аскер кийимин кийип алган согушчандар автоунаа менен парламенттин имаратына жакын жайгашкан "Бардо" музейине кирип барган. Согушчандар көрүүчүлөр арасындагы чет элдик туристтерди барымтага алышкан. Теракт үчүн жоопкерчиликти "Ислам мамлекети" террористтик уюм өзүнө алды.
