БИШКЕК, 28-июнь — Sputnik. Адам укугу боюнча Кыргызстандын Универсалдык мезгилдүү серептин (УМС) алкагындагы доклады БУУнын сессиясында бир добуштан колдоого алынганын Тышкы иштер министрлигинин маалымат кызматы билдирет.
Женева шаарында 2015-жылдын 24-июнунда БУУ Кеңешинин адам укугу боюнча 29-сессиясы өттү.
Кыргызстандын Женева шаарындагы БУУ жана башка эл аралык уюмдардагы Убактылуу өкүлү Улан Жусупов Кыргызстандын адам укугу боюнча жасалып жаткан аракеттерге кыскача мүнөздөмө берип, берилген сунуштар Кыргызстандын мыйзамдарына, эл аралык талаптарга ылайык кабыл алынганын белгилеп өттү.
Сессия жүрүшүндө Кыргызстанда адам укугу боюнча жасалып жаткан аракеттер белгиленип, өзгөчө аялдарга жана балдарга, ден соолугу боюнча мүмкүнчүлүгү чектелген адамдарга карата жана жакырчылыкты кыскартуу боюнча туруктуу өнүгүүнүн улуттук стратегиясын иштеп чыгуудагы иштерге оң баа берилди.
