БИШКЕК, 26-июнь —Sputnik. Жогорку Кеңештин депутаттары Кубанбек Киргизбаевди Конституциялык палатанын соту кылып дайындашты.
Жогорку Кеңештин жума күнкү кезексиз жыйынында Конституциялык палатанын бош ордуна шайлоо болуп, депутаттар Кубанбек Киргизбаевдин талапкерлигин жактарды. Электрондук жашыруун добуш берүүнүн жыйынтыгында анын талапкерлигин 69 депутат колдосо, төрт депутат каршы деп добуш берди.
Кубанбек Киргизбаев 1949-жылы туулган. Жогорку юридикалык билимге ээ. Эмгек жолун адвокат катары баштап, кийин Юстиция министрлигинде, Бишкек шаардык сотунда, Жогорку сотто иштеген. Акыркы учурда адвокат болуп иштеп турган.
Конституциялык палата он бир судьядан: Конституциялык палатанын төрагасынан, анын орун басарынан жана тогуз судьядан турат. Буга чейин бир бош орун бар болчу.
