Мигранттар үчүн экзамен суроолорунун жашыруун болушуна Коомдук палата каршы чыкты

БИШКЕК, 26-июнь — Sputnik. Коомдук палата мигранттар үчүн экзамен билеттеринин жашыруун болушуна каршы чыкканын Россиянын Коомдук палатасынын маалымат кызматы билдирди.

Майдын ортосунда Россиянын Федералдык миграция комитети бир катар оңдоолор камтылган федералдык мыйзамдын долбоорун макулдашууга берген эле. Ага ылайык, чет элдик жарандардын үч категориясы үчүн керектүү упайларды ажыратып айырмалоону мыйзам аркылуу бекитүү жана кийинки деңгээлге өтүү үчүн экзамендин жыйынтыктары төмөнүрөөк деңгээлдер үчүн да жарактуу болот деген принципти бекитүү, ошондой эле текшерүү материалдарына карата талаптарды катуулатуу жана өз мекенинде орус тили экинчи мамлекеттик тил болуп эсептелген чет элдиктерди орус тили боюнча экзаменден бошотуу каралган.

25-июнда Россиянын Коомдук палатасында "Орус тили, Россиянын тарыхы жан РФтин мыйзам негиздери боюнча комплекстүү экзаменди киргизүү жагынан федералдык мыйзамдарды жакшыртуу жөнүндө" коомдук угуулар өттү. 

Коомдук дипломатияны өнүктүрүү жана бөтөн жердеги мекендештерди колдоо боюнча комиссиянын төрайымы Елена Сутормина аталган оңдоолордун баары максатка ылайык, бирок текшерүү материалдарына карата талаптарды катуулатуу жана суроолорду өзгөртүү дегенге макул эместигин айтты. 

"Биз мындай көз карашка макул эмеспиз, себеби экзамен алуу системасынын башкы максаты — мигранттар үчүн кыйынчылыктарды жаратып, бөгөт коюу эмес, алардын биздин жерде ылайыкташуусуна көмөк кылуу", — деди ал.

Сутормина суроолордун тизмеси жана башка экзамендин материалдары ачык жана жеткиликтүү болушу керектигин белгиледи.

Россиянын Эл достугу университетинин проректору Анжела Должникова экзамендин талаптарын катуулатуу маселеси боюнча таптакыр карама-каршы пикирлер айтылып жатканын жана экзамендер бир жагынан жасалма көрүнүшкө, экинчи жагынан мигранттар үчүн олуттуу бөгөткө айланбашы үчүн, жакшы таразалап чечим кабыл алынышы керектигин айтат.

Мындай ойго Россиянын Федералдык миграция комитетинин алдындагы Коомдук кеңештин төрагасы Владимир Волох да макул экенин билдирип, бул система аймактык деңгээлде кандай иштей турганына кылдат көз салыш керектигин белгилдеди. Дал ошол чет аймактарда белгилүү бир маселелер жана кыйынчылыктар пайда болууда дейт ал.

Миграциялык саясат боюнча Коомдук палатанын жумушчу тобунун жетекчиси Владимир Шапошников тест өткөрүү борборлору иштеп жаткан жарым жыл ичинде чечүүнү талап кылган бир катар суроолор бар экени айкын болгонун, Коомдук палатага кайрылгандар көп экенин, дал ушунун аркасында кайсы маселенин үстүндө дагы иш алып баруу керектиги аныкталганын баса белгиледи.

Отурумду жыйынтыктап жатып, Елена Сутормина орус тилин кенен жайылтуу үчүн жакынкы чет өлкөлөрдөн окутуу борборлорун ачуу, ошондой эле жергиликтүү мугалимдерге орус тилин окутуу ыкмаларын үйрөтүүнүн зор маанисин белгиледи. 

"Коомдук дипломатияны өнүктүрүү жана чет өлкөлөрдөгү мекендештерди колдоо боюнча комиссиянын ишинде башкы багыттардын бири ушул", — деди ал. 

Аталган комиссиянын күчү менен Ошто борбор ачылып, бир катар долбоорлор ишке ашырылып жатканын баса белгиледи.

Елена Сутормина угууга катышкандардын бардык сын-пикирлери эске алынарына жана иш-чаранын жыйынтыктары боюнча бийликтин ыйгарым укуктуу органдары үчүн сунуштар иштелип чыгарына ишендирди.