БИШКЕК, 25-июнь — Sputnik. Ош шаарында төрт айлык ымыркайды сатып аткан учурда 46 жаштагы аял кармалды. Бул туурасында Ош ШИИБдин маалымат кызматынын жетекчиси Жеңиш Ашырбаев Sputnik мааламат сайтына билдирди.
Милициянын маалыматына ылайык, 31 жаштагы келин менен 46 жаштагы өгөй кайненеси акча керек болгондуктан 4 айлык ымыркайды сатууну чечишкен.
"Келиндин күйөөсү Россияга иштегени кеткен. Кармалган эки аял тең иштебейт, Өзгөн районунун тургундары", — деп билдирди Ашырбаев.
Учурда тергөө иштери улантылып, кармалгандарга карата Кылмыш жаза кодексинин "Адам сатуу" беренеси боюнча кылмыш иши козголду.
Буга чейин Токтогул районунун тургуну аялы Россияга иштеп кеткенинен пайдаланып, эки жашар баласын 50 миң сомго баалап, сатып жибергенин Акыйкатчынын аппараты билдирген болчу.
