БИШКЕК, 25-июнь — Sputnik. Коррупцияга каршы күрөшүү кызматы (КККК) ЭКККМК кызматкерлеринин эки адамды сабап, тоноп кеткенин аныктаган.
УКМКнын маалыматы боюнча, жума күнү Финполдун 10 кызматкери Бишкек-Торугарт автожолунун Ысык-Ата районундагы Кең-Булуң айыл аймагынан жүргүнчү менен келе жаткан унааны токтоткон.
"Финполдун кызматкерлери машина ичиндегилерди сүйрөп чыгышып, себепсиз ур-токмокко алышкан. Натыйжада таяк жеген адамдар жабыркап, бирөөсүнүн оң колу сынган", — деп айтылат билдирүүдө.
Мындан тышкары, ЭКККМК кызматкерлери мыйзамсыз түрдө жабырлануучулардын биринин 7,3 миң доллар жана 500 сом өлчөмүндөгү акчасын тартып алышкан.
Текшерүү учурунда жарандарды ур-токмокко алгандар ЭКККМКнын эки кызматкери экени аныкталган.
Келтирилген далилдердин негизинде аталган кызматкерлер УКМКнын СИЗОсуна киргизилди. Тергөө учурунда окуяга тиешеси бар ЭКККМКнын башка кызматкерлерине да укуктук баа берилери белгиленди.
