БИШКЕК, 24-июнь — Sputnik. Жогорку Кеңештин бир катар депутаттары Баш мыйзамга өзгөртүү киргизүү боюнча көтөрүп жаткан демилгеси менен өлкөдөгү стабилдүүлүккө шек келтиргени турат. Мындай пикирин "Легендарлуу парламенттин" спикери, коомдук жана мамлекеттик ишмер Медеткан Шеримкулов "Парламент" радиосунда сүйлөп жатып айтты.
Экс-спикер Шеримкуловдун пикиринде, Баш мыйзамга өзгөртүү киргизүү тууралуу демилге бери дегенде эле Конституцияга сый мамиленин жоктугу.
"1993-жылы 5-майда кабыл алган Конституциябыз 9 жолу өзгөрүлдү. Улам эле өзгөртө берүү, менин жеке пикиримде, Конституцияга жасалган сый мамиленин жоктугу, экинчиден, республиканын өзүндө стабилдүүлүктүн жоктугу. Айрым депутаттардын комитетке коюп, анан палатага чыгарабыз, дагы өзгөртүү киргизебиз деп жатканы, менимче, туура эмес", — деди Шеримкулов.
Ал 2010-жылы кабыл алган Конституциянын 114-беренесинин 2-бөлүгүндө "2020-жылга чейин 3,4,5,6,7,8-бөлүмүнө өзгөртүү киргизбеш керек" деп жазылып тургандыгын кошумчалады.
Мамлекеттик ишмер, эгерде бул демилге улана берсе, келе жаткан парламенттик шайлоодо чатак жаралышы мүмкүн деген божомолун айтты.
"Мен бүгүн иштеп жаткан депутаттарга да, президентибизге да кайрылгым келип турат. Чындап эле ушул өзгөртүүлөрдү киргизип, референдум өткөрөбүз дей турган болсоңуздар, анда келе жаткан шайлоо чатак менен өтөт", — деди Шеримкулов.
Ал Жогорку Кеңештин депутаттарына кайрылып, алардын көтөргөн демилгеси туруксуздукка себепкер болуп каларын эскертти.
"Бүгүнкү депутаттарга улуу агаңар катары кайрыларым, ушул кооптуу жолдон алысыраак болуп, ага барбасаңар. Себеби, эгерде пикир келишпөөчүлүк чындап эле курчуп кете турган болсо, эл арасында мамлекеттүүлүк солгундап кетсе, анын күнөөкөрү силер болуп калган турасыңар", — деди легендарлуу парламенттик спикери.
Апрель окуяларынан кийинки 2010-жылы өткөрүлгөн референдумда өлкөнүн башкы документине 2020-жылга чейин өзгөртүүлөрдү киргизүүгө мораторий жарыялоо чечими кабыл алынган. Мораторийди алып салуу үчүн жалпы элдик референдум өтүшү керек.
