БИШКЕК, 16-июнь — Sputnik. Жогорку билим берүүнүн жалпы стандарттары түзүлүп, ЖОЖдорго өтүүдө чектөөлөр киргизилиши керектигин Sputnik агенттигине эксперттер билдиришти.
Sputnik агенттигинин кабарчысы эксперттерден мамлекеттеги жогорку билим берүү системасын кантип жакшы жагына өзгөртүүгө болорун сурап көрдү.
Кыргыз-Орус славян университетинин эл аралык журналистика кафедрасынын башчысы Александр Кацев Sputnik агенттигине Кыргызстанда билим берүү системасынын жалпы стандарттары иштелип чыга электигин билдирди.
"Бизде билим берүүнүн 5-6 системасы иштейт – россиялык, америкалык, түрк ж.б. Анын ар биринин өзүнүн стандарттары жана баалоосу бар. Бул баш аламандыкты жаратууда", — дейт Кацев.
Профессордун пикиринде, жогорку окуу жайлардын баарын бирдей стандартка алып келүү керек.
Укук коргоочу Анара Дауталиева Кыргызстандагы жогорку билим учурда өз баалуулугун жоготту деп эсептейт. Анын айтымында, студенттер диплом алыш үчүн беш жылдык өмүрүн сарптаганы менен, кийин ал жөн гана кагаз катары кабыл алынууда.
"Биздин университеттер тестирлөөдөн 110дон кем балл алган абитуриенттерди кабыл алууга даяр. Бул керек болсо "эки" да эмес, бул "бир" деген баа. Кандайдыр бир бирдиктүү талаптар киргизилиши кажет, мисалы, 130дан аз балл алдыңбы – университеттин босогосун аттай албайсың, техникумга тапшыр деген сыяктуу", — дейт Дауталиева.
Укук коргоочу ЖОЖго өтүүнү чектөө жөндөмдүү абитуриенттерди тандап алууга мүмкүндүк берип, мектеп окуучуларынын алган билимине олуттуу көңүл буруусун шарттай турганын кошумчалады.
