БИШКЕК, 13-июнь — Sputnik. Балыкчы шаарындагы жеке турак-үйлөрүнүн биринде жарылган граната КР Куралдуу күчтөрүнүн Башкы штабынын аскер бөлүктөрүндө каттоодо жок экенин мекеменин маалымат кызматы билдирди.
12-июнь күнү болжол менен түнкү саат бирде милицияга Балыкчы шаарынын Кызыл-Омпол көчөсүндөгү үйлөрдүн биринде жарылуу болгондугу тууралуу маалымат түшкөн. ШИИБнын ыкчам-тергөө тобу жеринде абал менен таанышып, окуянын чоо-жайын иликтеген. Жарылуудан жабыр тарткан 13 жашар өспүрүм ооруканага бара жаткан жолдо каза болгон. Дагы бир бала менен аял учурда ооруканада.
Башкы штабдын маалыматы боюнча, жетекчинин буйругу менен жумушчу топ түзүлүп, жарылуунун себептерин аныктоо үчүн кырсык болгон жерге жөнөтүлдү.
Алдын ала маалыматка ылайык, "РГД-5" гранатасы КР Куралдуу күчтөрүнүн Башкы штабынын аскер бөлүктөрүндө каттоодо жок.
