БИШКЕК, 13-июнь — Sputnik. Балыкчы шаарында 12-июнда болжол менен түнкү саат 11.30дар чамасында Кызыл-Омпол көчөсүндөгү жеке турак-жайлардын биринде жарылуу болуп, 13 жаштагы бала каза болгонун КР ИИМдин маалымат кызматы билдирди.
Алдын ала маалыматтарга ылайык, 12 жана 13 жаштагы балдар граната менен ойноп атып, ал жарылып кеткен. Анын кесепетинен 13 жаштагы бала каза болуп, экинчиси жабыр тарткан, башка бөлмөдө отурган 37 жаштагы аял да жабыркаган. Окуя болгон жерге тийиштүү органдардын кызматкерлери барышкан.
"Азырынча граната алардын колунда кандайча жарылып кеткени аныктала элек. Бир бала ооруканага бараткан жолдо каза болгон. Экинчисинин абалы оор, ал жандандыруу бөлүмүндө", — деп билдирет маалымат кызматы.
ИИМден билдиришкендей, гранатаны өспүрүм балдардын бирөөсүнүн агасы алып келген. Каза болгон бала ал күнү конокко келген.
ИИМдин маалымат кызматы билдиргендей, үй ээлери граната бар экенин билишкен, бирок ага маани бербей машыгуучу граната деп ойлошкон. Маалымат кызматы кайдыгерлик адам өлүмүнө алып келгендигин кошумчалады.
