БИШКЕК, 13-июнь — Sputnik. Кыргызстандын экономикасы Евразиялык экономикалык биримдиктин ченемедрине 2017-жылдан тарта гана ыңгайлашарын өкмөт жыйынында экономика министри Олег Панкратов билдирди.
Анын айтымында, эмки жылы ИДПнын номиналдуу көлөмү 4,1 пайызга өсөрү жана 488,6 миллиард сом болору болжолдонууда. Инфляция 10,2 пайызды түзөт.
"Анын өсүшүнө азык-түлүккө болгон баанын 10-15 пайыз, өнөр жай товарларына 13 пайыз, тейлөө кызматына 10 пайызга өсүшү таасирин тийгизет. Мындан тышкары, коммуналдык кызматтардын баасынын жогорулашы жана айыл чарба продукциясына болгон баанын сезондук олку-солку болушу күтүлүүдө", — деди чиновник.
Панкратов Кыргызстандын экономикасы ЕАЭБдин ченемдерине эки жылдан кийин гана ыңгайлашарын, мындан улам, экономика 2017-жылдан тарта тездик менен өнүгө баштарын кошумчалады.
"Үчүнчү мамлекеттерден товар киргизүү шарттары түп-тамырынан бери өзгөрөт, бирок ЕАЭБге мүчө мамлекеттердин товарларынын биздин рынокко кирүүсү жеңилдейт", — деди министр.
Президент Алмазбек Атамбаев 21-май күнү Кыргызстандын Евразиялык экономикалык биримдикке кошулуусу келишимин ратификациялоо боюнча мыйзамга кол койгон.
