БИШКЕК, 9-июнь — Sputnik. Суу — бүгүнкү күндө Борбордук Азия өлкөлөрүнүн негизги бейкуттук факторуна айланып бара жаткан жашоо үчүн өтө зарыл табигый ресурс деп билдирди "Суу өмүр үчүн" деп аталган жогорку даражалуу эл аралык конференцияда премьер-министр Темир Сариев.
Ал конференцияда чыгып сүйлөгөн расмий сөзүндө энергетикалык коопсуздук үчүн Кыргызстан өз аймагында экологиялык таза энергетика булагы болуп эсептелүүчү ГЭСтерди куруу боюнча бир катар долбоорлорду акырындык менен ишке ашырып жаткандыгын белгиледи.
"Камбар-Ата ГЭСтеринин курулушу Токтогул суу сактагычын энергетикалык эмес, сугат багытында иштешине мүмкүндүк берет. Аталган ГЭСтердин суу сактагычтары суу ресурстарын тең салмактуу пайдалануу тартибине өтүп, өлкөнүн суу агымдарынын төмөн жагында жайгашкан сугат талааларын суу менен ишенимдүү камсыз кылууга шарт түзөт", — деди Сариев.
Премьер ГЭСтерди куруу менен гана сугат мезгилиндеги суунун тартыштыгын чечүүгө болот деп эсептейт.
Ал конференцияда азыр аймакта суу ресурстарын бөлүштүрүү Борбордук Азиянын бардык өлкөлөрүнүн кызыкчылыктарына жооп бербей турганын, айрыкча бул аймактын суу корлорун калыптандыруучу өлкөлөргө тиешелүү экендигин белгиледи.
"КР биздин эл аралык өнөктөштөр гидроэнергетикалык долбоорлорду ишке ашырып, республиканын жана бүтүндөй аймактын энергетикалык инфраструктурасын жакшыртуу боюнча иш-аракеттерди активдүү колдойт деген ишеничин билдирет", — деп белгиледи өкмөт башчысы.
Анын пикиринде, энергетикалык жана сугат кызыкчылыктарынын теңдешсиздиги, сууну жыл мезгилине жараша пайдалануунун да тең эместиги карама-каршылыктарды күчөтүп жатат.
"Кыргызстан менен Тажикстан — суунун ири запастарына ээлик кылат, бирок учурда калыптанган мамилелердин алкагында аймак үчүн эле эмес, бүтүндөй дүйнөлүк тең салмактуулукту кармап туруу үчүн олуттуу болуп эсептелген суу корлорун топтоп жана сактагандык үчүн татыктуу экономикалык компенсация албай келет", — деп баса белгиледи Сариев.
Ал Токтогул суу сактагычында суунун көлөмүн толтуруу үчүн өкмөт кыш мезгилинде калкка электр жарыгын берүүнү токтотуп, коңшу өлкөлөрдүн сугат мезгили үчүн суу топтоого аргасыз болуп жатканын кошумчалады.
"Бул биздин өлкө эл аралык документтерде каралган компенсацияларды жетиштүү албагандыгына карабай, суу агымынан төмөн жакта жайгашкан мамлекеттердин кызыкчылыгы үчүн көрүлгөн аргасыз чаралар болуп эсептелет", — деп чечмеледи премьер-министр.
Премьер белгилегендей, Кыргызстан суу-энергетика маселелерин эки тараптуу мамилелердин да, көп тараптуу механизмдердин да алкагында талкуулоого дайыма ачык.
