БИШКЕК, 9 июнь — Sputnik. Премьер-министр Темир Сариев жана Тажикстандын президенти Эмомали Рахмон өз ара пайдалуу шартта электр энергиясын жеткирүү маселелерин талкуулашканын өкмөттүн маалымат кызматы билдирди.
8-июнь күнү КР премьер-министри жана Тажикстандын президенти өкмөт башчынын Дүйшөмбүгө болгон иш сапарынын алкагында жолугушту.
Тараптар эки өлкөнүн ортосундагы кызматташуунун тереңдеп жана өнүгүп жатканын белгилешти.
Жолугушуу учурунда президент Рахмон делимитация процессин тездетүү үчүн Тажикстандын тийиштүү органдарына тапшырма берерин белгиледи.
Ошондой эле тараптар электр энергиясын экспорттоо үчүн Афганистан менен Пакистандын рыногуна жол ачкан CASA —1000 долбоорун ишке ашыруунун маанилүүлүгүн айтышты.
Мындан тышкары, жолугушууда Тажикстандан Кыргызстанга электр энергиясын өз ара пайдалуу шартта жеткирүү, "Кытай-Кыргызстан-Тажикстан" темир жолунун курулушу, Түркмөнстан-КЭР газ түтүгүнүн курулушу жана аймактык коопсуздук маселелери талкууланды.
