БИШКЕК, 27-май — Sputnik. Бишкекте жана Ошто батирлердин баасы апрель айында өткөн жылдын ушул эле мезгилине салыштырганда 10-20 пайызга арзандаганын Мамлекеттик каттоо кызматы билдирет.
МККнын кыймылсыз мүлк рыногу боюнча серепчиси Айдар Сукенбаевдин айтымында, турак-жайдын арзандашы биринчи кезекте жыл мезгилине байланышкан фактор болуп эсептелет.
"Жайдын алдында экинчи жолу сатылып жаткан турак-жайлардын баасы дайыма төмөндөйт. Буга ошондой эле Кыргызстандын ЕАЭБге кошулушу да түрткү болду", — дейт адис.
Турак-жай сатып алууну каалоочулардын көпчүлүгү ыңгайлуу мезгилди күтүп турат, ошондуктан азыр сунуш суроо-талаптан жогору болууда.
"Андан тышкары, батирлердин баасынын төмөндөшүнө жылдын башынан бери доллардын курсунун улам өзгөрүшү, рублдун арзандашы жана мигранттар которгон акчалардын кыскарышы таасирин тийгизди", — деп белгиледи Сукенбаев.
Бишкекте бир жана эки бөлмөлүү батирлердин бир топ арзандаганы байкалууда. Мисалы, 308-сериядагы батирлер 2015-жылдын апрелинде былтыркы жылдын ушул мезгилине салыштырганда 17,7 пайызга, ал эми эки бөлмөлүүлөрү 13,7, үч бөлмөлүүлөр 10,4 пайызга арзандады.
"Азыр бир бөлмөлүү үй 2,3 миллион сом турат. Ошол эле турак-жай былтыр 100 миң сомго кымбат болчу", — дейт серепчи.
МКК Ош шаарында да турак-жайдын баасы төмөндөгүн белгилейт. 104-сериялуу бир жана үч бөлмөлүү батирлер 16,2 жана 16,8 пайызга арзандады.
105-сериялуу батирлердин баасы да бир топ төмөндөдү. Бир бөлмөлүүлөр 20,8 пайызга эки бөлмөлүүлөрү 22,9, үч бөлмөлүүлөрү 22,4 пайызга арзандады. Бир чарчы метрдин орточо баасы 415-523 доллар, ал эми өткөн жылы бул баа 535-660 доллар болчу.
