БИШКЕК, 26-май — Sputnik. Үстүдөгү жылдын алгачкы төрт айынын жыйынтыгы боюнча миранттардын Кыргызстанга которгон акчаларынын көлөмү 37 пайызга кыскарганы жөнүндө Улуттук Банктын төрагасы Толкунбек Абдыгулов маалымат жыйында билдирди.
Өткөн жылы мигранттардын Россиядан Кыргызстанга которгон акчаларынын жалпы саны 2,17 миллиард АКШ долларын түзгөн.
Абдыгуловдун айтымында, эл аралык акча которуулардын 97 пайызын рубль түзөт.
"Рубль менен которулган акчалардын саны көтөрүлүп, бирок доллар түрүндө келип жаткан которуулардын көлөмү кыскарды. Бул өткөн жылы рублдун куну түшкөндүгүнө байланыштуу. Акча которуулар боюнча алдын ала божомодоп бир нерсе айтуу азырынча эрте. Баары биздин жарандардын канчасы башка өлкөлөргө акча тапканы кетерине жараша болот", — деди ал, бирок акыркы төрт айдагы акча которуулардын көлөмүн так атаган жок.
Россия, Белоруссия жана Казакстан 2014-жылдын 29-майында Астана шаарында Евразиялык экономикалык биримдик жөнүндө келишимге кол коюшуп, ал 2015-жылдын 1-январында күчүнө кирген. Экинчи январда ЕАЭБга Армения кошулду. Ал эми 8-майда Евразиялык экономикалык биримдиктин саммитинде Кыргызстандын ЕАЭБге кошулушу тууралуу акыркы документтерге кол коюлду.
