БИШКЕК, 28-май – Sputnik. Бишкекте жашыруун казино табылганын Экономикалык кылмыштуулукка каршы күрөшүү мамлекеттик кызматы билдирет. Маалыматка ылайык, кумар оюндарынын ыкшыбоздору көбүнесе Кытайдын жарандары экени аныкталган.
Атайын операциянын натыйжасында, имаратта мыйзамсыз ишмердүүлүк үчүн керектүү аба рулеткасы, покер үстөлдөрү, фишкалар, карта андан сырткары кумар оюндарында колдонула турган бир топ буюмдар табылып, VIP-зал бар экендиги ачыкталган.
"Казино өз аймагындагы бардык кыймылга байкоо жүргүзө ала турган техникалык каражаттар менен камсыз болгон. Ошондой эле кирип-чыгуу жолдору темир жана тор эшиктер менен тосулган. Имаратка жашыруун кирүү үчүн өзүнчө эшик табылды. Операция учурунда имаратта оюнчулардын көбү кытайлык жарандар экени аныкталды", — деп билдиришти мекемеден.
Аталган факты боюнча Экономикалык кылмыштуулукка каршы күрөшүү мамлекеттик кызматынын тергөө бөлүмү тарабынан кылмыш иши козголду.
2012-жылдын башынан тарта Кыргызстанда казинолордун ишмердүүлүгүнө тыюу салынган.
