Конева: алынып келген дары 300дөн ашык баланын өмүрүн сактап калат

БИШКЕК, 22-май — Sputnik. 25-майда Кыргызстандын төрөт үйлөрүндө Куросурф дарысын таратуу башталат. Бул препарат ай-күнүнө жетпей туулган балдардын өмүрүн сактап калат деп билдирди Help the Children кайрымдуулук фондунун президенти Елена Конева.

Жогорку биотехнологиялардын негизинде даярдалган дары жаңы төрөлгөн ымыркайды респиратордук дистресс –синдромунун (өпкөнүн туура эмес иштешинен) кесепетинен чарчап калуудан сактайт. Коневанын айтымында, бир ампула жок эле дегенде 450 доллар турат.

Бардыгы болуп республикага жалпы баасы 350 миң долларды түзгөн 775 ампула алынып келди. Буга каражатты эл аралык донорлор бөлүп берди дейт фонддун башчысы.

Анын маалынматы боюнча, дары өтө кымбат болгондуктан, мамлекет аны өз акчасына сатып алганга даремети жетпейт.

"Бир ымыркайга эки ампула керек кылынат. Демек, бул дарылар 300дөн ашык баланын өмүрүн сактап калат", — деди Конева.

Андан тышкары, Саламаттык сактоо министрлиги кымбат баалуу дары бериле турган төрөт үйлөрүнүн башкы дарыгерлерин аны сактоо үчүн муздаткычтарды даярдоону милдеттендирди.

Дарынын максаттуу пайдаланылышын Help the Children фонду дары бериле турган балдардын ата-энелери аркылуу текшерет. Аны таратуунун милдеттүү шарттарынын бирине ылайык, дарыланууга муктаж баланын атасынын же энесинин телефону болушу керек.

Фонд Куросурфту 25-майда в Бишкекте, Ошто, Жалал-Абада жана Ысык-Көлдө тарата баштайт.

Help the Children — SKD коомдук кайрымдуулк фонду Бишкекте негизинен онкологиялык, гематологиялык жана иммунологиялык дартка чалдыккан балдарга жана алардын үй-бүлөлөрүнө көмөк көрсөтүүгө адистешкен. Фонд иш алып барган сегиз жыл ичинде 27 баланын өмүрүн сактап калды жана 30 миллион сомдон ашык жардам көрсөттү.