БИШКЕК, 21 мая — Sputnik. Кыргызстандын ЕАЭБге кириши жана Ирандын эркин соода аймагына кошулушу эки тараптуу кызматташууну кеңейтүүгө жол ачат деп билдирди Хорасан Резави провинциясынын губернатору Али Реза Рашидиан.
КР ТИМ басма сөз кызматынын маалыматы боюнча, 19-29-май күндөрү Кыргызстандын Ирандагы элчиси Асанбек Осмоналиев аталган провинцияга иш сапары менен барган. Анда губернатор, Ирандын ТИМ өкүлдөрү жана провинциянын бир катар жетекчилери менен эки тараптуу сүйлөшүүлөр жүрдү.
Натыйжада губернатордун жетекчилиги алдында Хорасан-Резави провинциясынын соода делегациясынын Кыргыз Республикасына иш сапарын уюштуруу чечими кабыл алынды.
Шаршемби күнү КР парламенти мамлекеттин ЕАЭБге кошулуу келишимин ратификациялаган. Учурда келишимге КР президенти А.Атамбаев кол койду. Эми келишимди ЕАЭБге мүчө мамлекеттердин парламенттеринин ратификациялашы күтүлүүдө.
Евразиялык экономикалык биримдиктин 8-майдагы биринчи саммитинде республиканын альянска кошулуу жөнүндөгү акыркы документтерге кол коюлган.
