БИШКЕК, 20-май — Sputnik. Бишкек мэриясынын имаратынын алдында борбор шаардын жашоочуларынын калаадагы мыйзамсыз курулуштарга каршы пикети өтүп жатат.
Ал жерде ураандарды көтөргөн 20га жакын жарандык активисттер катышууда.
Уюштурулган пикеттин жетекчиси "Биздин укуктар" коомдук фондунун башчысы Калича Умуралиеванын айтымында, мэриянын алдына шаарда болуп жаткан иштерге кайдыгер карабаган адамдар чогулушту.
"Биз Бишкек шаарынын кеңешине борбор калаадагы мыйзамсы курулуштарды түшүрбөө боюнча жардам сурап кайрылабыз. Азыр мындайларга чыдаган болбой калды. Парктар менен сейил бактарды, дегеле бош турган алакандай жердин баарын мыйзамсыз басып алып жатат. Тротуарлар менен баса албай калдык. Арыктардын эмнеге айланып калганын көрүп жатасыңар", — деди ал.
Умуралиева сот системасы шаардыктарды колдобой жаткандыктан, абалдын чыгуунун митинг өткөрүүдөн башка жолу калбай калганын айтты.
Пикетке чыккандарды ЖК депутаты, "Ар Намысчы" Замир Бекбоевдин Жер кодексине түзөтүү киргизүү демилгеси кыжырлантып жатат, анда жалпы колдонуудагы жерге капиталдык курулуш салууга уруксат берилген.
Умуралиева Sputnik маалымат сайтынын кабарчысына шаардагы төрт райондун жашоочулары мэр алардын көтөргөн көйгөйлүү маселесин угууну талап кылышарын айтты.
Ал эми Бишкек мэриясынын пикетчилерге борбор калаанын башкы архитектору Бактыбек Абдиев келерин билдиришти.
