БИШКЕК, 19-май — Sputnik. Мас болуп алып мушташтан бир киши каза болгонун Бишкек шаарынын ИИББдин маалымат кызматы билдирди. Май айында (так күнү белгисиз) "Тез жардам" кызматы №1-клиникалык оорукананын хирургия бөлүмүнө сабалган, мас абалындагы 38 жаштагы кишини алып келишкен. Анын кандай жаракат алганы такталган эмес.
Дарыгерлердин айтымында, ал адам энесинин үйүнүн жанынан табылган.
Маркумдун 57 жаштагы энесинин айтымында, анын баласы достору менен арак ичкен. Түнкү саат 24.00дөр чамасында ал сыртка чыгып, короонун жанында жаткан баласын көрөт. Таяк жеген киши өзүнө келбей каза болгон.
Аталган факты боюнча Свердлов РИИБдин тергөө бөлүмү кылмыш ишин козгогон.
Тергөө маалында аныкталгандай, киши достору менен арак ичип отуруп, чатакташып кеткен.
Досун өлтүрдү деген шек менен 49 жаштагы Кемин районунун тургуну кармалган. Учурда ал Бишкектеги №1-убактылуу кармоо жайына камакка алынды.
