БИШКЕК, 14-май — Sputnik. Эмгек, миграция жана жаштар министрлиги Россиянын Федералдык миграция кызматынын "кара тизмесиндеги" кыргызстандыктарды чыгаруу боюнча иштерди ыкчамдатуусу керектигин премьер-министр Темир Сариев өкмөттүн жыйынында билдирди.
Анын айтымында, кыргызстандыктардын 86 пайызы өлкөнүн ЕАЭБге кирүүсүн колдойт жана мигранттар үчүн жеңилдиктердин каралышын күтөт. Бул багыттагы негизги ишти Эмгек, миграция жана жаштар министрлиги аткарышы керек. Аталган министрлик эмгек миграциясы боюнча калк арасында түшүндүрүү иштерин жүргүзүүсү кажет экендигин премьер айтты.
"8-майда Москва шаарында тарыхый чечим кабыл алынды. Биз Евразиялык экономикалык биримдикке кирген мамлекеттердин башчылары менен аталган уюмга кирүү жөнүндө протоколго кол койдук. Биз биримдикке өнөктөштөрүбүз менен бирге кирип жатабыз", — деди Сариев.
Россия, Белоруссия жана Казакстан 2014-жылы май айында Астанада ЕАЭБди түзүү боюнча келишимге кол коюп, ал 2015-жылы 1-январда күчүнө кирген. Жыл башында бул биримдикке Армения да кошулган.
