БИШКЕК, 13-май — Sputnik. Премьер-министр Темир Сариев Баткен облусундагы кыргыз-өзбек чек арасында болгон окуяны обьективдүү иликтөө керектигин Мамлекеттик чек ара кызматынын төрагасы Раимберди Дүйшөнбиев менен болгон жолугушууда тапшырганын өкмөттүн маалымат кызматы билдирди.
Өкмөт башчысы Өзбекстандын тийиштүү органдары менен биргеликте чатактын себептерин жана шарттарын иликтөө боюнча иш-чараларды уюштуруу тапшырмасын берди.
Мындан тышкары, Ош, Баткен жана Жалал-Абад облустары боюнча жергиликтүү орган жетекчилерине жергиликтүү калк арасында Кыргызстандын мыйзамдарын жана чектеш мамлекеттер менен чек ара тартибин сактоо боюнча түшүндүрүү иштерин жүргүзүүнү күчтөндүрүү тапшырмасы берилди.
