БИШКЕК, 8-май — Sputnik. Ички иштер министрлигинин 10-Башкы башкармалыгынын кызматкерлери WhatsApp жана социалдык тармактар аркылуу өлкөдөгү абалды туруксуздаштыруу максатында маалыматтарды жайылтып жүргөн 17-25 жаштагы жарандарды кармады. Алар менен тартип коргоо органдары иштеп, алдын ала түшүндүрүү иштерин жүргүзүп жатышат. Бул туурасында өкмөттүн маалымат кызматы билдирди.
Учурда эл арасында, өзгөчө түштүк аймакта экстремисттик маанайдагы маалыматтар, улуттар аралык мамилелерге шек келтирген маанайдагы кептер таратыла баштаган. Ал WhatsApp аркылуу жана социалдык тармактарда жайылтылган. Кыргыз өкмөтү мындай маанайдагы маалыматтарды жокко чыгарып, азыр абал тынч экендигин, элдин кооптоонуусуна эч кандай негиз жоктугу боюнча расмий билдирүү таратты.
Кыргызстандын ичинде жарандардын коопсуздун сактоо жана мыйзамга каршы тартип бузуулардын алдын алуу максатында, ички иштер органдарынын бөлүмдөрү 30–апрелден тарта күчөтүлгөн тартиптеги кызмат өтөөгө өткөн. Бул туурасында өкмөт бүгүнкү таратылган расмий маалыматында кабарлады.
Маалыматта Улуу Жеңиштин 70 жылдыгына карата өткөрүлө турган майрамдарда коомдук тартипти сактоо боюнча иштер жүргүзүлүп жаткандыгы айтылат.
Республика боюнча бул жаатта ички иштер бөлүмдөрүнүн 7 миңге жакын кызматкерлери жана элдик дружиналардын 5000ге жакын мүчөлөрү иш алып барат.
