БИШКЕК, 30-апр. — Sputnik. "Айыл чарбасын каржылоо-3" долбоорунун алкагында дыйкандарды, айыл чарба азыктарын кайта иштетүүчүлөрдү колдоо максатында жеңилдетилген түрдө бир миллиард 277 миллион сомдук үч миңден ашык насыя берилгенин өкмөттүн маалымат кызматы билдирди.
29-апрелге карата алынган маалымат боюнча айыл чарбасын колдоо долбоорунун алкагында мал чарбачылыгын өнүктүрүүгө бир миллиард 71 миллион 476 миң сом насыя берилсе, өсүмдүк өстүрүүгө 170 миллион сом, кайта иштетүүчү ишканаларга 35 миллион сом жеңилдетилген насыя түрүндө берилген.
Быйыл дыйкандарга бериле турчу насыялар жаңы шартта берилүүдө. Ал үчүн насыя ала турган жактын акчаны кандай пайдалана турганы боюнча бизнес планы болушу шарт.
Айыл чарбасын өнүктүрүү үчүн быйыл өкмөт дыйкандарга жеңилдетилген шартта беш миллиард сомдук насыя берүүнү пландап жатат.
