БИШКЕК, 23-апр. — Sputnik. Согуш ардагери 92 жаштагы Курманбек Акуновду Волоколамск шаарында Дүйшөнкул Шопоковдун эстелигинин ачылышына жиберүүгө каражат табылганын журналист Тынчтык Алтымышев билдирди.
Алтымышевдин айтымында, согуш ардагеринин Москвага барып келүү билетин "Эйр Бишкек" компаниясы бекер берет. Ал эми аны коштоп бара турган баласына кеткен каражатты социалдык тармактагы активисттер өздөрү чогултуп берүүгө ниеттенип жатышат. Алардын Волоколамск шаарында жүргөн учурунда кете турган чыгымын Жогорку Кеңештин депутаты Шаршенбек Абдыкеримов өзүнө алды.
Согуш ардагери Москва шаарына 6-майда учуп, кайта 11-майда Бишкекке келет.
9-майда Улуу Жеңиштин 70 жылдыгы белгиленет. КР өкмөтүнүн маалыматына ылайык, өлкөдө азыр 1 миң 313 согуштун ардагери калган. Былтыр 300 ардагер каза болгон.
