БИШКЕК, 17-апр. — Sputnik. Президент Алмазбек Атамбаев Бишкекте өткөн "Экстремизм жана такфиризм — коомго келтирилген коркунуч" деп аталган эл аралык симпозиумдун катышуучулары менен жолугуп жатып, билим бар жерде терроризм болбостугун айтты.
Мамлекет башчысы Кыргызстанга дүйнөгө белгилүү руханий лидерлердин жана окумуштуу-аалымдардын келиши динге ишенүүүчлөрдүн ислам тарыхын жана ар дайым экстремизмге каршы туруп келген окумуштуулардын, дин кызматкерлеринин эмгектерин терең окуп үйрөнүүгө түрткү берет деген ишенимин билдирди.
"Экстремизмдин жана такфиризмдин исламга тиешеси жок экенин, исламдын атын жамынып алып жасалып жаткан жаман иштер ислам дүйнөсүндө, ыйык Куранда айыпталарын карапайым мусулмандарга түшүнүдүрүүнүн жолдорун биргелешип табасыздар деп ишенем. Анткени мындай түшүндүрүү иштерин имамдар, аалымдар гана аткара алат", — деди президент Атамбаев.
Президент 1990-жылы республикада 39 мечит болсо, бүгүнкү күндө өлкөбүздө 2362 мечит жана 81 ислам окуу жайы, ошондой эле 68 ислам борбору, фонддор жана бирикмелер бар экенин айтты.
Мамлекет башчысы кыргыз коомчулугунда диний кызматкерлер диндин негиздерин жеткире билбеген учурлар кездешерин да белгиледи.
"Ачык айтайын, айрым карапайым мусулмандар гана эмес, кээ бир имамдар да диндин негиздерин билишпейт. Көп учурда сыртынан такыба көрүнгөнү менен алар билимсиз жана диний жактан сабатсыз болууда. Анын кесепетинен өлкөбүздө исламдык радикалдуу агымдарга өтүп кеткендер көбөйүп жатат. Алсак, 2010-2011-жылдары Бишкек шаарында жана Чүй облусунда "Жайшуль Махди" уюмунун радикалдуу жихадчылары бир катар терактыларды жасап, адамдар каза болду", — деп айтты мамлекет башчысы Атамбаев.
Мамлекет башчысы илим өсүп, билим болгон жерде терроризм болбостугун, себеби, билимсиздик жана караңгылык – радикализмдин жана терроризмдин башаты экендигин айтты.
