БИШКЕК, 1-апр. — Sputnik. Бишкектеги жолбун иттер менен мышыктар шаар тургундарынын тынчын алууда. Алар көбүнчө таштандыларда тамактангандыктан, түрдүү жугуштуу оорулардын жайылышына себеп болот деген кооптонуу күч.
Расмий эмес маалыматтарга ылайык, борбор калаанын көчөлөрүндө санитардык-эпидемиологиялык абалды кооптуулукка кептеген 20 миңден ашык ит кароосуз жүрсө, тентип жүргөн мышыктардын так саны жок.
Шаар тургундарынын айтымында, жолбун иттер өздөрүнчө үйүрлөргө топтошуп алып, көчөдө жүргөн жарандарга коркунуч жаратууда. Жыл сайын шаардык ооруканалар ит тиштеп кайрылгандарды каттоого алат.
Жаздын келиши менен кароосуз калып, көчөдө тентип жүргөн ит менен мышыктар тууп баштагандыктан, аларды саны дагы өсүшү мүмкүн.
Жаныбарларды коргоочу мамлекеттик эмес фонддор жолбун ит, мышыктардын санын азайтуу үчүн алардын күчүктөрү менен мыймыйларын багып алууга берет. Бирок, алардын аракети шаардын санитардык абалын оңдоого жетишсиз.
"Тазалык" муниципалдык ишканасынын жолбун иттер менен күрөшүү бөлүмү качан олуттуу аракеттерди көрүп баштайт?
