БИШКЕК, 1-апр. – Sputnik. Улуу Жеңиштин 70 жылдыгына карата Москва шаарындагы Кызыл Аянтта өтүүчү парадга катышуу ниетин билдирип, кайрылган ардагерлер көп болгондуктан, алардын саны такталууда. Бул туурасына Sputnik маалымат сайтына Согуш ардагерлеринин, КР Куралдуу күчтөрүнүн жана тартип коргоо органдарынын республикалык уюмунан билдиришти.
Кыргыз өкмөтү аталган маселени караштырып көрүп, балким, кошумча каражат бөлүшү мүмкүн.
"Буга чейин Москва шаарындагы Кызыл Аянтта өтүүчү парадга согуштун үч ардагери катышаарын маалымдашкан, бирок, учурда алардын санын дагы бир нече кишиге көбөйтүү каралууда, — деди Согуш ардагерлеринин, КР Куралдуу күчтөрүнүн жана тартип коргоо органдарынын республикалык уюмунун жетекчисинин орун басары Качкын Саргазаков.
Москва шаарына Жеңиштин 70 жылдыгына Кыргызстанда иш алып барган "Евразиялык фонд" да үч ардагерди алып бармакчы. Андан сырткары облустардан тандалган жети ардагер Москва шаарындагы Улуу Ата мекендин согуштун музейине барып, андан сырткары жыл сайын салтка айланып калган "Жеңүүчүлөрдүн балына" катышмакчы.
Качкын Саргазаков "Жеңүүчүлөр балынын" катышуучулары уюштуруучулар тарабынан чакырыларын жана аларга кеткен чыгымдарды да өзүлөрү көтөрөрүн кошумчалады.
