БИШКЕК, 30-мар. — Sputnik. Өзгөчө кырдаалдар министрлигинин (ӨКМ) атайын техникасы Бишкек – Ош жолун кардан тазалап жатканын Өзгөчө кырдаалдар башкармалыгынын башчысы Мухаммед Сваров Sputnik сайтынын кабарчысына билдирди.
Анын айтымында, ӨКМдин кызматкерлери атайын техниканын жардамы менен Төө-Ашуудагы карды тазалап жатат. Өткөн суткада ашууда 400 автоунаа өтө албай, топтолуп калган.
"Түнкү саат 12ден таңкы 6га чейин жолду тазаладык. Шамал карды тазалоого жолтоо болуп, аны кайта эле жолго шилеп салууда", — деди Мухаммед Сваров.
ӨКМ өкүлү айдоочулардын зарыл иши болбосо Ош – Бишкек автоунаа жолуна чыкпай турууну суранат. Ал Ашуудагы бурганак дагы 3 күнгө улана турганын кошумчалады.
"Бүгүн ашууда жүк ташыган автоунааларга чектөө киргизилди. Биз абалды жол кайгуул кызматынын кызматкерлери менен биргеликте көзөмөлдөп турабыз", — деди Сваров.
Жол кайгуул кызматынан маалымдашкандай, бир суткада өлкө аймагында 21 жол кырсыгы катталып, андан эки киши каза болуп, 25и түрдүү жаракат алган.
