БИШКЕК, 18-мар. – Sputnik. Кыргызстандын аймагында буга чейин ар кандай себептер менен каттоого алынбай иштеп келген 480 мечит 2015-жылы каттоодон өткөрүлөт. Мындай маалыматты Кыргызстан дин башкармалыгынын маалымат кызматы Sputnik сайтына билдирди.
Кыргызстанда учурда 2 532 мечит болсо, анын 2 055и каттоодон өтүп иш алып барып келет. Ал эми 480и мыйзамсыз иштеп жатат.
Бишкек шаарында алардын саны — 22. Ар кыл саясий окуялардан улам, көп жер тилкелери басылып алынып үй курулган. Бир катар жаңы конуштарда мечиттер да ушундай жагдайда түптөлгөн.
"Жаңы конуштарда үйлөр мыйзамсыз курулган, бул жерлердин башкы планы бекитилбестен үйлөр менен мечиттер салынып калган. Кээ бирлери ашар жолу менен курулса, кээ бири мамлекеттик органдардын уруксат кагазы жок түптөлгөн. Учурда муфтияттын мечиттерди каттоо бөлүмү бул жаатта иш алып барууда", — деп билдирди муфтияттын маалымат кызматынан.
Февралдын аягында республикада мечит жана медреселердин ишмердүүлүгүн жакшыртуу боюнча Аалымдардан турган атайын текшерүү комиссиясы ишин баштаган.
