БИШКЕК, 12-мар — Sputnik. АКШ Россиялык улуттук коммерциялык банкка (РУКБ) жана Евразиялык жаштар биримдигине санкциялык тизмеден орун бөлүп берди деп билдирет РИА Новости АКШнын каржы ведомствосуна таянуу менен.
РУКБ үчүн бул биринчи жолу болуп жаткан жок. Ага каршы мындай чаралар өткөн жайда эле Европа биримдиги тарабынан көрүлгөн. РУКБ — Крым Россияга кошулгандан бери аталган жарым аралда иш алып барып жаткан негизги каржы мекемеси болуп эсептелет. Өткөн жылы РУКБ Москва банкынын курамында болчу, эми ага Крымдын өкмөтү ээлик кылат.
Американын Каржы министрлиги Крым Россияга кошулганга чейин банк жарым аралдын аймагында иштеген эмес деп билдирди.
"Кремль каржы институтун Крымды РФтин курамына тартуу аракеттерин жеңилдетүү үчүн пайдаланган. РУКБ жарым аралдан кетип жаткан банктардын өкүлчүлүктөрүн көзөмөлдөп, эми ал Крымдагы эң ири каржы институтуна айланды", — деп жазат министрлик.
АКШнын "кара тизмесине" Евразиялык жаштар биримдигинин киришин ведомство "Украинада тынчтыкты сактоо зарылчылыгы" менен түшүндүрөт.
"Евразиялык жаштар биримдиги согуш көндүмдөрүнө ээ адамарды жалдоо менен алектенет. Жалдануучулар болсо ДЭР деп аталуучулардын аскерлеринин катарын толтуруп жатат", — деп түшүндүрөт АКШнын Каржы министрлиги.
"Евразиялык жаштар биримдиги" коомдук бирикмеси 10 жылдан бери бар. Ал Эл аралык евразиялык кыймыл тарабынан түзүлүп, анын жаштар канаты болуп эсептелет.
Батыш Россияны кантип тышкы дүйнөдөн бөлүп жатат
Украина боюнча өз көз карашын коргоп жаткан Россия бир жылдан бери бир нече жолу Батыштын санкцияларына туш болду. Мындай чаралар акыркы жолу бир ай мурун колдонулган. Анда Европа биримдиги санкциялардын тизмесин кеңейткен болчу.
