Бишкек, 5-мар. — Sputnik. Парламентте аялдарга жана жашы жете электерге мунапыс берүү боюнча мыйзам долбоору бир топ талкууну жаратты. Алардын бир катарлары мындай кадам абакта отурган башкалардын укугун бузуп жатат дешсе, бир катарлары калктын аялдуу катмары болгон, учурда абакта отурган балдар менен аялдарга мунапыс берүү туура демилге экендигин айтышты.
Мыйзам долбоору боюнча доклад жасаган депутат Курманбек Осмонов республиканын жаза аткаруу жайларында 958 аял отурганын, бул Кыргызстан үчүн аз эмес көрсөткүч экендигин айтты.
"Мыйзам долбоорунда каралган мунапыска 901 киши түшүп жатат. Анын 827си аялдар, 74ү жашы жете элек балдар ", — деди Осмонов.
Мыйзам долбоорунун демилгечилеринин бири, депутат Ширин Айтматова эрезеге жете элек куракта абакка отургузулгандардын көбү мигранттардын балдары экендигин билдирди.
"Жаза мөөнөтүн өтөп жаткан өспүрүмдөрдүн арасында окуп-жазганды 15-16 жашында үйрөнүп жаткандар бар. Өлкөбүздө жумушчу орундары түзгөн жокпуз, бул — мигранттар бизди багып жатат деп кубанганыбыздын баасы. Балдар туура эмес жолго түшүп баратат. Алар менен иштеген, туура эмес жолго түшүп алгандыгын түшүндүргөн психологдор, реабилитациялык ишти жүргүзгөн эч ким жок. Балдар агресивдүү. Кыргыз түрмөлөрүндө байлар отурбайт. Алар маселесин сотко чейин чечип алышат. Ал эми аялуу катмар болгон балдар менен аялдар жокчулуктун айынан кылмышка барып жатат. Акырында алар, жакыр болгон үчүн жазаланып жатат… Андыктан, бул мыйзамды колдоп беришиңиздерди суранам", — деди демилгечи Айтматова.
Депутаттар арасында аталган мыйзам долбоору эмне үчүн аялдар жана жашы жете электерди мунапыска чыгарууга багытталгандыгы боюнча суроо жаралып, Баш мыйзам боюнча ар башка мунапыстарды карай берсе туура болобу деген суроолорду жолдошту.
"Бул аялдарга жана эрезеге жете электерге арналган атайын мунапыс жөнүндө мыйзам долбоору. Мындай мыйзамдар буга чейин да болуп келген. Ошон үчүн жалпы адам укугун бузууга кирбейт жана эл аралык нормаларга толук жооп берет", — деди Осмонов.
Кыргызстандын эгемендүүлүк тарыхында, 29 мунапыс болуп, акыркысы 2014-жылдын январь айында жарыяланган.
