БИШКЕК, 4-мар — Sputnik. "Демократия жана жарандык коом үчүн коалициянын" президенти Динара Ошурахунова Кыргызстандын Кылмыш жаза кодексинин 36-беренесине кабыл алынган өзгөртүүлөр жөнүндө Sputnik кабарчысынын суроолоруна жооп берди.
— Кандай дейсиз, кабыл алынган оңдоолор турак-үйгө мыйзамсыз кирип барууга байланышкан кылмыштарды азайта алабы?
— Кескин кыскарта албайт деп ойлойм. Албетте, бул кайсы бир майда криминалдык элементтердин күнүмдүк тиричиликке байланышкан кылмыштарды жасоого бөгөт болот. Бирок мыйзамга каршы иш жасоого катуу ниеттенген кылмышкер баары бир ага барат.
— Анда бул өзгөртүүлөрдүн бизге пайдасы кандай болот?
— Кеп пайдада эмес, ал өзгөртүүлөрдүн эл аралык стандарттарга туура келишинде. Себеби көпчүлүк өлкөлөрдө мындай беренелер бар, бирок аларда муну тең салмактап туруучу система да бар экендигин эстен чыгарбаш керек. Кыргызстанда жүрүп жаткан демократиялык өзгөрүүлөрдүн алкагында бул багытта да иштерди жасоо зарыл.
Мен, балким, аша чаап жаткандырмын, бирок бул жерде менин оюма "Чөгүп бара жаткандарды куткарып калуу алардын өз колунда" деген макал келет. Ошондуктан дагы бир жолу белгилейин дегеним, күч түзүмдөрүндө, башка укук коргоо органдарында, жана, албетте, мыйзам тармагында биздин жарандардын коопсуздугун камсыз кылуучу рефорамларды улантуу жана күчтөндүрүү керек деп эсептейм.
