БИШКЕК, 26-фев — Sputnik. Парламент "Кумтөрдүн" айынан өкмөт отставкага апрелде кетиши мүмкүндүгүн божомолдоп жатат.
Парламент учурда бул маселени талкуулап жатат.
ЖКнын бейшембидеги жыйынында "Ар Намыс" фракциясынын лидери Феликс Кулов, эгерде өкмөт Кумтөр" боюнча мамлекеттин кызыкчылыгын көздөй тургандай кылып чечпесе, апрелде министрлер кабинети отставкага кеткенге туура келе тургандыгын айтты.
"Эгерде биргелешкен ишкана түзүү боюнча макулдашууга жетише алышпаса, анда улутташтыруу боюнча маселени коюуга туура келет. 26-мартта "Кумтөр" боюнча аудиттин жыйынтыгы даяр болот. Алгач, отчетту угуп туруп, анан чечим кабыл албайлыбы. Эгерде ал убакка чейин маселе чечилбесе, апрелде министрлер кабинетинин отставкасы туурасындагы маселени көтөрөбүз. Андан сырткары сүйлөшүүлөрдүн жүрүшүндө жергиликтүү эл менен депутаттардын пикири да эске алынышы керек", — деди Кулов.
Ал эми "Республика" фракциясынын лидери Максат Сабиров өкмөт "Кумтөр" боюнча парламенттин токтомун толук кандуу аткара албагандыгын айтты.
"Эгерде министрлер кабинети биргелешкен ишкана түзүүдө 67 пайызга жеткире албаса, анда кенди улутташтыруу керек. Бүгүн өкмөт экология боюнча иштерди да аягына чагарбай, ЖКнын бир топ токтомдорун аткарбаптыр. Рудниктин иши боюнча аудит жүргүзүлбөй, конкреттүү эч кандай чечимдер кабыл алынбаптыр. Эгерде өкмөт мамлекеттин пайдасына эч нерсе чече албаса, анда аны отставкага кетирүүнү сунуштайбыз", — деди Сабиров.
