БИШКЕК, 24-фев — Sputnik. "Өзүнүн кичинекей балдарын өлтүргөн деп шектелип жаткан аял камералаштарын сабап жатат жана анын жасагандары акыл-эсин жоготкон адамдай", — деп билдирди Кыргызстандын белгилүү адвокаттарынын бири Икрамидин Айткулов.
Анын айтымында, убактылуу кармоочу жайда камалып жаткан, мурда Республикалык психиатриялык борбордо каттоодо турган Амира Ибраева жүрөк-кан тамырларынын оорусу жана диабет менен жабыр тарткан аялдар менен бир камерада жатат.
"Мына, үч күндөн бери Ибраева өз камералаштарын сабап, муунтуп, чачтарын жулуп, камерада болгондун баарын талкалап жатат. Ал катуу кыйкырык менен камерада ары-бери чуркап, эшикти тепкилеп, жанындагыларына улам асылып жатат. Камерадан психикалык оорулуу Ибраеванын зомбулугуна дуушар болгон аялдардын кыйкырыктары кайра-кайра угулууда. Жүрөктөрү түшкөн аялдар жардам сурап жалынып жатса да, алардын үнү үч күндөн бери администрацияга жетпейт. Эркектер — нөөмөттө турган офицерлер эшиктин жанына чогулмайынча мындай жырткычтык улана берет, бирок алар камерага көпкө чейин кире албай, ичинде болуп жаткандарды эшиктин сыртынан угуп турушат", — дейт адвокат.
Анын маалыматы боюнча, нөөмөтчү офицерлер акыры камерага чуркап кирип, Ибраеваны кармап, фельдшер ага ийне менен реланиум саят.
"Камерадагы аялдар кыйналып, коркуп бүтүшкөн. Алардын жашоого жана саламаттыка болгон укуктары одоно бузулуп жатат, кырсык каалаган учурда болуп кетиши мүмкүн. Үч күндөн бери аялдар корпусунун бүт үрөйү учкан. №1-убактылуу кармоочу жайдын медицина кызматкерлери да, жетекчилиги да абалды оңдоо боюнча талаптагындай эч бир чара көрбөстөн, Ибраеваны камакта кармоо жөнүндө сот чечимине таянышууда. Үч күндөн бери Ибраевадан жабыр тарткан аялдарга эч жардам көрсөтүлбөй эле, алардын абалын медиктер каттоого алган жери жок", — деп кошумчалады Айткулов.
15-февралда Ишки иштер башкы башкармалыгы өзүнүн кичинекей балдарын өлтүргөндүк үчүн шектелүүчү аялды кармаган. Ал мурда Республикалык психиатриялык борбордо каттоодо тургандыгы жана учурда Бишкектин мектептеринин биринде иштегендиги аныкталан. Ал эми ошол №44-мектептин директору ага жакшы мүнөздөмө берген.
Ведомстводон билдиргендей, психиатриялык жана башка эксперизалардын натыйжалары бир ай ичинде белгилүү болот.
Балдардын сөөктөрү Ысык-Көл областына коюлду. Ал эми аялды болсо №1-убактылуу кармоочу жайга эки айга камашты.
